Tarmachan

Ainm saidheansail
Tarmachan Lagopus muta

Tarmachan
Rangachadh saidheansail
Rìoghachd	Animalia
Fìleam	Chordata
Clas	Aves
Òrdugh	Galliformes
Teaghlach	Tetraonidae
Gèineas	Lagopus
Spèiseas	L. muta
Lagopus muta
Ainmean eile
Logopus mutus
Briathran Gàidhlig eile
Cearc nam Beann

’S e eun a th’ anns an tarmachan^[1], Laideann: Lagopus muta^[2]. Mar a tha fhar-ainm cearc nam beann ag innse, tha e cumanta air monaidhean na h-Albann.

Tha an tarmachan dàimheach don chirc-fhraoich, Lagopus lagopus scotica, agus gu tric lorgar an dà ghnè eòin air an aon bheinn, a’ chearc-fhraoich gu h-ìosal agus an tarmachan gu h-àrd. Ach tha diofar mòr eatarra: bidh an tarmachan a’ dol bàn anns a' gheamhradh, leasachadh a chumas am falach san t-sneachd e. As t-samhradh tha e cuideachd fìor dhoirbh fhaicinn am measg nan creag, ma shuidheas e gu sàmhach.

Tha an t-ainm aige stèidhichte air a ghairm: tarm no torm. Chaidh e a-null bhon Ghàidhlig don Bheurla mar “ptarmigan”, le ‘p’ neo-fhuaimnichte neo-eachdraidheil a’ dèanamh aithris air an t-Seann-Ghreugais πτέρυξ, sgiath. Tha cuid de bheanntan air an ainmeachadh air a shon, leithid Sgòrr an Tarmachain agus Meall nan Tarmachan.

Iomraidhean

↑ Faclan Nàdair^{[dead link]} aig Dualchas Nàdar na h-Alba (Leughte 17 Faoi. 2015)
↑ B’ àbhaist do dhaoine bhith a’ sgrìobhadh Lagopus mutus agus Lagopus lagopus scoticus, oir mar as trice tha an deireadh ‘-us’ air facal a’ ciallachadh gu bheil am facal fireann. Ach b’ e mearachd a bha siud. Am facal Seann-Ghreugais λαγωπους, tha e boireann agus is e “muta” agus “scotica” a tha ceart.