Christine Primrose

Tha Christine Primrose (An Gearran 1950-) na seinneadair Gàidhlig agus tidsear-ciùil. Rugadh i ann an Càrlabhagh, Eilean Leòdhais, ach tha i a' fuireach anns an Eilean Sgitheanach a-nis.

Tha i air a bhith a' seinn bhon a bha i na nighean bheag, is mar a thuirt ise fhèin ann an agallamh, ‘s e dìreach rudeigin nàdarach a bh’ ann ‘san teaghlach aice-se. Bhuannaich i am Bonn Òr an t-Seann Nòis aig a’ Mhòd Nàiseanta Rìoghail ann an 1974 is duais aig a’ Phan Celtic Festival ann an 1978, agus, ged nach robh e cumanta aig an àm sin, rinn i dreuchd dhen cheòl Ghàidhealach, agus tha i air a bhith ga riochdachadh air feadh an t-saoghail, gu h-àraid ann an Aimearaga a Tuath, Astràilia, Sealan Nuadh agus anns an Roinn Eòrpa, mar eisimpleir tha i air a bhith aig an Smithsonian Folklife Music Festival còmhla ri Alison Kinnaird. A bharrachd air sin, bha i na preasantair air prògraman air an telebhisean agus rèidio.

San latha an-diugh tha i air aon de na seinneadairean as cliùitiche ann an saoghal na Gàidhlig, is gabhaidh i pàirt air ciùirmean-chiùil bho àm gu àm. A thuilleadh air sin, tha i air a bhith ag obair aig Sabhal Mòr Ostaig bho 1982, a’ bhliadhna mus do thòisich na cùrsaichean làn-ùine, na rùnaire an toiseach agus an uair sin bho 1993 a' teagasg air a' Chùrsa (BA) Gàidhlig is Ceòl Traidiseanta agus cùrsaichean goirid.

Duaisean

Bonn Òr an t-Seann Nòis aig a’ Mhòd Nàiseanta Rìoghail 1974.

Pan Celtic Festival 1978.

‘Seinneadair Gàidhlig na Bliadhna’ aig Duaisean Ceòl Traidiseanta na h-Alba 2009.

Clàran

Àite Mo Ghaoil (1982)

Quiet Tradition (còmhla ri Alison Kinnaird) (1990)

'S Tu Nam Chuimhne (1995)

Gun Sireadh, Gun Iarraidh (2001)