Sgarbh

Sgarbh
Rangachadh saidheansail
Rìoghachd	Animalia
Fìleam	Chordata
Clas	Aves
Òrdugh	Pelecaniformes
Teaghlach	Phalacrocoracidae
Gèineas	Phalacrocorax
Spèiseas	P. carbo
Ainm saidheansail
Phalacrocorax carbo Linnaeus, 1758

'S e eun-mara a th' anns an sgarbh Phalacrocorax carbo.

Canar cuideachd ballaire no ballaire a' bhòthain ris, agus tha ainmean leithid: cailleach-dhubh no fitheach mara air, ach 's e sgarbh an t-ainm as cumanta san latha a th' ann.

'S e sgarbh òg a th' ann an sgaireag, ach dh'fhaodar sgaireag a thoirt air faoileag òg cuideachd.

Tha an sgarbh gu math coltach ri sgarbh an sgumain Phalacrocorax aristotelis.

Sealg an sgairbh

Bhathar a' sealg agus ag ithe an sgairbh, 's a' dèanamh feum dheth ann an diofar dhòighean san t-seann aimsir.

Tha cunntas ga thoirt le Eachann MacDhùghaill ann an 1938 air mar a bhathar a' glacadh nan sgarbh ann an Colla.

Bidh na sgairbh, ann an àm dol a laighe anns a' chreig, a' fàgail aon sgarbh air faire is an còrr dhiubh a' pasgadh an cinn fo an sgròbain. A' chiad rud a dhèanadh na sealgairean, nuair a rachadh iad air tìr air a' chreig, b'e an sùil fhaotainn air sgarbh-na-h-aire. Bidh sgarbh-na-h-aire daonnan air binnean nas àirde na an còrr, agus 's e faotainn thuige mun toireadh e gorc-rabhadh (goir-rabhadh) às, ris an robh obair na h-oidhche gu lèir an crochadh. An uair a gheibheadh esan às an rathad, cha robh ach gabhail don chòrr às an leth-oir gus am biodh feumalachd gach teaghlaich, a bhiodh ri roinn do na sgairbh fhaotainn, air a sholar gu pailt is gu tomadach.

Ceangal a-mach

• recipe.htm/ Brochan sgairbh (Gàidhlig)